(Jamita Evangelium, Minggu II-hon dung Trinitatis)
Pinatolhas ni Pdt Dr. Robinson Butarbutar, KRP HKBP
Hamu angka Dongan Sahaporseaon hinaholongan di sandok Indonesia,
Ingkon mangula do jolma i. Apostel Paulus manonahon, ‘na so ra mangula, unang ma ibana mangan’ (2 Tes 3:10, pat 1 Tes 4:11).
Alai, angka dongan, mansai jotjot do hita mangula salojalojana, pola ndang adong tingkinta be mangulon, marsaor, martangiang, marrekreasi, manghalashon ngoluon, gabe loja situtu ngolunta on, mura marsahit pamatang, panghilalaan nang rohanta, jumempek umurta.
Lupa hita mangoloi patik ni Debata, asa tabuat tingki mangulon jala marlas ni roha sian ari tu ari, minggu tu minggu, bulan tu bulan dohot sian sada taon tu taon na mangihut.
Ala ni i, asa hipas angka pangula, dipatupa angka bangso do angka uhum na mangondihon jolma i sian halojaon na sumalin. Isara, intap ni ualu jom ma mangula jolma i sadari, di tongatonga ni i adong tingki mangulon satonga jom, mangula lima manang onom ari saminggu, jala asing ni libur nasional, cuti ala ni marpamatang na denggan/tubutubuan, mangulon ala marsahit dohot marsitaonon, ingkon adong tingkinta di bagasan sataon mangulon sian ulaonta, isara dua tu opat minggu sabulan. Margaji do pangula i uju libur.
I do hataridaan ni na pinangido ni Debata di 3 Musa 25: 1-13 i, najolo di tingki ni si Musa asa ganup minggu adong sadari ari paradianan, ganup pitu taon adong sataon bolon, jala di taon pa-50-hon maradi jolma i sian ulaonna, marlas ni roha, marolopolop mardongan angka uninguningan. Pola do digoari ari mangulon i ari na badia, i ma ari na ingkon sipasidingon,marasing sian angka ari na asing na digohi ulaon.
Alai, hamu angka dongan, saleleng on, ala ndang manang hurang unduk hita tu patik mangulon dohot marlas ni roha i, gabe lupa hita na ingkon dohot do tong mangulon angka na rap mangula dohot hita, isara horbo, lombu nang masin pe tahe di angka partani, songon i nang angka inganan ni ulaonta i, isara onan di partigatiga, tano di partani, manang ambar, aek godang, tao, nang laut di angka pardengke, nang angka na asing i na ringkot di ngolunta jolma, isara angka binatang ni parpahanpahan/peternakan, angka pidong/unggas, angka bunga nang udara.
Panghorhonna, masa na mangihut on: Tano i, torus do tapaksa mangula, tapangke do angka napu sian bahan kimia gabe mamboan mara. Somalna dua hali sataon panen, gabe opat hali tabahen, manongtong.
Di ujungna mampanghorhon ndang napu be tano i, jala jolma na manganhon parbue ni tano i pe manganhon rasun na paro marragam sahit, isara kanker.
Aek ni ambar, aek bolon, tao nang laut tasegai do marhite na mangambolongkon, dohot mangusehon sampah nang rasun sian dapurta, pudi jabu nang sian pabrikta tu sunge, tao nang laut, mangalehon sipanganon ni angka dengke na gok rasun, gabe sega aek, ndang boi be inumonta, marrasun nang dengke i masuk tu pamatangta.
Di peternakan pe, talehon angka na mambahen tibu jala ndang marnaso angka i berproduksi, gabe ndang apala hipas be tapangan. Ro ma angka sahit tu angka i nang tu hita.
Di perkebunan pe, tabahen do reboisasi sarombang tu haranganta, ndang hot marragam. Mohopan ma hita. Marmatean angka na tinompa na asing i, dohot do orang utan.
Ala ni i, songon dalanta mangoloi patik sabat i, dijouhon Debata do tu hita asa mangaramoti angka na tinompa i sude, asa marhahipason hita nang nasida.
Diparbisuhi Debata ma hita sude, angka ilmuan, dewan, pamarenta, pengusaha, ekonom, rakyat dna patupasa, na di darat, di sunge, di tao, laut, nang udara.
Ai umbahen na dibahen Debata pe patik sabat i, asa sude do na tinompaNa i hipas. Sude ma hita halak Kristen di Indonesia patupa na tarbahen hita mangaramoti na tinompa. Amen.
